Міністэрства адукацыі зацвердзіла пералік спецыяльнасцяў вышэйшай адукацыі, на якія за кошт сродкаў рэспубліканскага бюджэту могуць быць залічаны грамадзяне Расіі па выніках адзінага дзяржаўнага экзамену (ЕГЭ). Адпаведная ведамасная пастанова №63 ад 16 сакавіка 2026 года апублікаваная на Нацыянальным прававым інтэрнэт-партале, паведамляе БЕЛТА.
У 2026 годзе абітурыентаў з Расіі гатовыя прыняць у 30 ВНУ Беларусі. "Зацверджана больш за 850 бюджэтных месцаў па 131 спецыяльнасці. Найбольшая колькасць месцаў - па інжынерных, сельскагаспадарчых, натуральна-навуковых спецыяльнасцях. ВНУ-лідары-Беларуская дзяржаўная ордэнаў Кастрычніцкай рэвалюцыі і Працоўнага Чырвонага Сцяга сельскагаспадарчая акадэмія (93 месцы), Беларускі дзяржаўны ўніверсітэт (82 месцы), Гродзенскі дзяржаўны ўніверсітэт імя Янкі Купалы (73 месцы)", - праінфармавалі ў прэс-службе Мінадукацыі.
У адпаведнасці з правіламі прыёму, для паступлення на выдзеленыя бюджэтныя месцы грамадзянам Расіі неабходна мець вынікі ЕГЭ па прадметах профільных выпрабаванняў не менш за 70% ад максімальна магчымага значэння.
